ملل ... خايف عليك

ملل

مابعرف ليش عم إكتبلك هلئ ...
بس حاسس هيك بملل ووحدة وعدم راحة لكلشي ومن كلشي وخايف عليك ...
احيانا بشوفك متفائل ومالك الدنيا بين إيديك ومبسوط عالآخر ... سدئني بفرحلك وبحب تضل هيك على طول ...ورغم هيك بخاف عليك ..
واحيانا متشائم ... ورافض كلشي حولك ... ومتغطرس ومزاجي ونرجسي ومابيفهم منك شي .. وعم تتخبى من ولاشي ...

مابعرف شبك .. !؟
بس عم حسك مو مطمن لشي ومع هالشي ماشي لقدام بطريق انت حاسو غلط ..(او وقت بتكون متشائم بحسو غلط) ....
الغلط إنك تضل هيك ماشي ...
وقف وفكر وبلش الخطوة الأولى من جديد ... لسه في وقت ...

ماضاع شي في تبلش من جديد وقت اللي انت بدك ...
ولاتبعد عنا كتير نحنا بنحبك ...

وسماع وطنش ...

سماع وطنش 2

رجعتلك ...
وينك ... وقت بتصل لفوق ... لفوق كتير ... تطلع شوي لتحت .. لانو تحت ... رح تلاقي العالم اللي ساعدوك ووقفو جنبك ... اصحى تطنشهون ...!!! لانو هنن وصلوك لفوء وبيجوز بدونون ترد تنزل لاسفل السافلين ... وانا مو حاببلك ياها هالشغلة ...!
لاتنسى المعروف ابدا ... وعطي اللي عطاك ضعفين واعميل منيح وكب بالبحر ولا تستنى شكر من حدا ... الشكر بيجيك من عند رب العباد ...
ليك لقلك .... الله سبحانو وتعالى مو بس تتذكرو وقت بدك شي ..! ووقت مابدك شي بتنسى ... اصحى هاه ... هو دخيل اسمو قادر يرجعك مطرح ماكنت اذا مو ألعن من ماكنت لاسمح الله ....

لاتواخذني مابعرف احكي فصحة ... وقلت لحالي هيك الفكرة بتصلك اسرع ....

المهم ...
لابيوم من الايام تفكر حالك وصلت لمحل ماحدا بيطالك وفيك تعمل يلي بدك ياه .... بلمحة بصر بيطير كلشي عندك وبتقول ياريت اللي جرى ماكان ....
ماعم خوفك انا ... بس من محبتي فيك عم قلك ....

اللي بحبك لا تنطشو .... وتركض ورى حدا ما بحبك بس انت بتحبو ... بكرة تندم ياجميل على قولة اخونا المصاروة ....
اللي بحبك داريه برموش عيونك ... واكيد فهمت علي ...

هالمرة ما رح طول عليك ...
حاجة لهون ...
بس راجعلك ....

ســماع وطنش 1

نصيحة مني....

لا تستعجل على شي ... لانو كلشي إلو وقتو .. ولا تكون طماع لانو الطمع إلو عواقبو ... هالحكي يمكن سمعانو كتير .... وهون المشكلة انو نحنا بنسمع وما بنطبئ ....
وينك ..

لا تستعجل بإختيار اي امر كان ... لانك وبعد اختيارك رح تلاقي حالك غلطان كتير كتير وانو في خيارات كتير انت ماكنت شايفها وضحت قدامك ...فكر كتير ... وفكر كتير منيح ... وخليلي القلب على جنب ... والمصلحة على جنب ... وفكر بكل حواسك مع بعض ... وادرس الموضوع من كل الجهات ...سدئني اذا ماعملت هيك رح تندم ... وبكرا بتقول انا قلت ....
لاتكون متهور وتختار ناس ما بيستاهلو انون حتى يكونو ناس .... لانو هالدنيا مليانه بالناس المناح والمناح كتير .... بس من كتر مالك مستعجل وسريع عين الله حولك وحوليك مابتشوفون الا بعد ما تكون اخترت وانضربت على قلبك ....

وساعتها رح توقع بين نارين انت حطيت حالك فيهون ....الشغلة مو صعبة ابدا ....
بس الصعب اذا اخترت غلط ونويت التراجع مثلا .... هون ساعتها رح تخسر قسم كبير من شي انت بنيتو ورح تبلش تبني من جديد ....بس بتمنى حتى وقت بدك تبني من جديد تعرف شو وليش ومشان شو عم تبني ....ويكون الاختيار التاني لإلك يلي بتمنى مايكون تاني ويكون اول هو الاختيار الصح وبكل الجوانب ...

هي فلسفة؟؟!!

بعرف انو فلسفة وحكي بلاطعمه وما بعبي الراس ... بس معلش اعتبرني شو ماكان وخود هالنصيحة مني ....
العمر عم يمشي بسرعة وانت واقف وماعم تلحقو وفي امل كمان ما تلحقو ابدا اذا حبيت تسرع اول شي شي سنتين تلاته ....هالسنتين تلاته رح يخسروك اقل شي سبع او تمن سنين اذا مو اكتر ... خليك عم تشتغل بمخك وبقلبك سوا واذا قلبك ماطاوعك متل ما بيعمل عادة ً خليه على جنب وبلش مع عقلك ...
إسأل كل الناس اللي حوليك عن التجارب اللي مرو فيها ولا تفكر حالك افهم واحد بالعالم وانو اللي عم تعملو هو الصح ...لك في عالم بتعطيك خبرة ببلاش بس انت بيكون معمي على قلبك ومعطى على عقلك ومو شايف شي ....
يا اخي عميل اللي براسك بس سماع هالعالم شو عم تقلك ... بجوز يكون كلامون صحيح ....في حكي كتير لسه ما قلتو بقلك ياه مرة تانية ....
لاتواخذونا طولنا عليكون ...

مشان شو؟ وليش؟

وقت بدك تروح لعندو لا تسألو مشان شو وليش ...
خليه على عماها وطنشو وما تعطي اهميه حتى ولو سألك ليش ...
لك هالعالم فاضي ومالو غير القصص والسير وهاد شو عمل وهاد ليش ...
على كل الاحوال اذا ما دئيتو ما بيفوت واذا ما انوجع مابيموت هيك قالولنا ... بس ما بعرف ليش ...
بدو يفهم كلشي ومابدو حدا يوجهلو تعليق على تعليقو ويقلو عم تعمل هيك ليش ...
معليش معليش معليش ... عودونا يجرونا مطرح ما بدون وما نقلون لا لوين ولا ليش ...
بس إذا استمرت هذه الحالة ...
سيصبح الوضع يرثى له ُ ...
وهي بالفصحى مو بالعامية ... عرفتو ليش ..؟

شي من هالشي ولكلشي

عامل حالو فهيم وبيفهم بكلشي وهو ومالو فهمان لهلاء شي ...
وبيوقفلك عالوحده وهو مابيعرف غير هالوحده وممشي كلشي ...
اذا حاكيتو بطنش واذا سكتت ياويلك بفكرك عم تدور على شي ..
كل شي إلو شي بس انو يفهمك مزبوط هي مالها شي ...
على كل حال صار اقناعو شي محال وصرنا بنعرف هالشي ...
بس عم نتركو على قعدتو بركي بتفك عقدتو وبيفهمنا شي ...
مبارح كان مبسوط وحاكيناها وضحك بس فجأة زعل من ولاشي ...
صرلنا مده بنقلو حطو بمحلو بس شرطك هو مفكر حالو عامل كلشي ...
مو مشكلتنا مشكلة هالشي بس المشكلة لما برد عليك ومو عرفان شي ..
وبيقلك انو شاعر اديب وفنان وهو عم يقنع نفسو بهالشي ..
بس بدكون الصراحه وبلا لف ودوران وبلا كلشي ...
الشاطر اللي بيفهم أي شي من ولا شي ...
وبيحسبها مزبوط ومابيضيع شي ...
وبيلاقي حل قطع بت صبي كان ولا بنت وبيخلصنا من هالشي ...
انا يمكن قربت خلص كلشي ...بس انتو فهمتو شي؟؟؟